اخبار الزمالك المصري : “لاعب الزمالك هيبقى فَلتة الكورة المصرية..و دونجا من أساسيات الفريق “

أكد جمال عبد الحميد، لاعب الزمالك السابق، أن البرازيلي خوان ألفينا بيزيرا، محترف الفارس الأبيض سيصبح “فلتة” الكرة المصرية

وقال عبد الحميد، خلال تصريحات تليفزيونية ببرنامج “ملعب أون”، عبر قناة “أون سبورت”:” الزمال فيه نجوم كبار وجماهير بتشجع الفريق بكل قوتها، وبتدفع أي لاعب إنه يلعب 90 دقيقة بأقصى ما عنده”.

وأجاب على سؤال هل الزمالك به نجوم كبار الآن؟ حاليًا: “طبعًا فيه نجوم كبار. أنا بعتبر عبد الله السعيد وعمر جابر نجوم كبار وأساسيين، ومعاهم ناصر ماهر، ما شاء الله لاعب بيعرف يفك أي طلاسم لأي فرقة.

وأشار عبد الحميد:” وكمان ناصر منسي، أنا بعتبره لو خد فرصته أكتر هيبقى هداف الدوري. هو أصلاً جه من البنك الأهلي وكان هداف الدوري، رغم إن البنك الأهلي مش بينافس على البطولة”.

وشدد: “وطبعًا في لعيبة كويسة كتير. الزمالك فيه نجوم كبار، النهارده مثلًا دونجا لما خرج ظهر الفرق الكبير. كل الناس بتقول مستواه قليل، لكن لما خرج بان قد إيه الزمالك محتاجه. لا، دونجا لاعب كويس جدًا، ومن الأساسيات في الزمالك”.

وواصل عبد الحميد:” وفي نجوم تانية زي عدي الدباغ، كل يوم بيزيد ويتطور، وكمان خوان بيزيرا ده هيبقى فلته في الكورة المصرية، لكن موضوع إن اللاعب يتعمد الحصول على بطاقة صفراء في المباراة الماضية لكي يشارك في مباراة الأهلي ده 50% إيجابي و50% سلبي”..