اخبار الزمالك المصري : ”كفاية دغدغة مشاعر ..وشوف مشاكلك أحسن”..تعليق قوي لشوبير على شكوى الزمالك ضد زيزو! فيديو

فتح الإعلامي الأحمر أحمد شوبير، النار على مجلس إدارة الزمالك، بعد التقدم بشكوى ضد اللاعب الخائن أحمد سيد زيزو، بسبب تصرفه غير المسؤول مع المهندس هشام نصر نائب رئيس نادي الزمالك.

وقال شوبير في تصريحات عبر برنامجه الإذاعي صباح اليوم الأربعاء: “الزمالك امبارح شكى زيزو في لجنة الانضباط واتهمه بتعمد عدم مصافحة المهندس هشام نصر نائب رئيس النادي، وطلب بتوقيع العقوبة اللازمة طبقًا للائحة. طب هي اللائحة بتقول إيه؟”

وتابع: “معلش أنا متأسف والله، بس أنا مضطر بقى، لأنه يا إما نشتغل شغل مؤسسي وشغل صح يا إما بلاها. يعني إيه أنا مش فاهم! هو إيه يعني؟ أنا هنا وجهت اللوم لزيزو على هذا التصرف، وعلى فكرة زيزو راح سلم على لاعيبة الزمالك كلهم، وراح سلم على الجهاز الفني والإداري، وحضن كابتن أحمد عبد الرؤوف بعد المباراة. يعني ده فيديو كان موجود، وده أسلوب جميل من زيزو، ووجهت له اللوم فقط على عدم مصافحته للمهندس هشام نصر.”

وأضاف: “لكن هي اللائحة بتقول إيه في هذا الأمر؟ هل بتقول إيقاف؟ ولا غرامة؟ ولا إيه بالضبط؟ خلينا نتكلم بمنتهى الوضوح، ما حضرتك وضّح لي عشان أبقى معاك في الصورة وأقول للناس. اللائحة بتقول إيقاف زيزو أربع مباريات؟ ولا تغريمه كذا؟ لائحة الانضباط التي تؤكد على احترام اللاعبين والتزامهم بالروح الرياضية، تنص المادة 6 على فرض عقوبات على من يتعرض بالإساءة إلى الاتحاد أو المجلس أو اللجنة أو الجهة المنظمة أو المسؤولين أو عناصر اللعبة.”

وواصل: “الزمالك طلب في شكواه توقيع العقوبات اللازمة على اللاعب طبقًا للائحة. أنا كنت متخيل الزمالك هيتكلم إزاي يصحح المسار بعد خسارة السوبر، وده أمر منطقي جدًا. الزمالك ممكن يخسر قدام الأهلي أو بيراميدز، طبيعي دي كورة. كنت متخيل إن الزمالك هيشتغل على الإصلاح مش على الشكوى.”

وأردف: “كان ممكن الزمالك يطلع بيان أو المتحدث الإعلامي يقول إن سلوك زيزو غير لائق، وأنا كمان وجهت له اللوم من منطلق الاحترام، لكن في نفس الوقت لازم نطبق القواعد على الكل، سواء جمهور أو لاعبين، عشان الدنيا تمشي بروح رياضية.”

واستكمل: “أنا عندي خسارة في الهاندبول والباسكت والكورة، لازم أتكلم وأواجه. الجمهور مستني ده، مش دغدغة مشاعر أو شكوى مالهاش لازمة. يعني حتى لو اتغرم زيزو ألف جنيه أو نص مليون جنيه، إيه الفايدة؟ الأحسن مجلس إدارة الزمالك يشتغل على النادي نفسه، يشوف مصير الكابتن أحمد عبد الرؤوف، يحل مشاكل القضايا اللي جاية من فرجاني وجروس وجوميز وغيرهم، مش يروح يشتكي زيزو في لجنة الانضباط.”

وأضاف: “يا جماعة خلينا منطقيين. دغدغة مشاعر الجمهور على السوشيال ميديا مش هتفيد. لازم نشتغل صح، مش نلهي الناس في تفاصيل صغيرة. الهدف لازم يكون إصلاح النادي مش تصفية حسابات.”

وقال: “زيزو ما تطاولش ولا قل أدبه ولا وجّه كلمة نابية. أنا قلت كان لازم يسلم، بس مش معقول نسيب كل اللي حصل ونقف عند النقطة دي. يا جماعة فكروا في الصالح العام، فكروا في ملايين الزملكاوية اللي نفسها النادي يرجع ينتصر وياخد بطولات.”

وتابع: “الزمالك دلوقتي عنده مشاكل في الفولي والباسكت والهاندبول والكورة، وما بقاش حتى بياخد المركز التاني في الدوري. لازم الإدارة تشتغل عشان تسعد الجماهير وترجع للمنافسة في دوري الأبطال.”

وختم شوبير تصريحاته قائلًا: “الله يخليكم، مجلس إدارة الزمالك، من فضلكم بصّوا لصالح النادي. ركزوا على القضايا المهمة زي موضوع أرض أكتوبر والطعن القانوني، لكن موضوع شكوى زيزو ده مش هيضيف للنادي حاجة. الناس لازم تنشغل إزاي الزمالك يرجع نادٍ بطولات وانتصارات، زي ما جمهوره متعود دايمًا.”