اخبار الزمالك المصري : شوبير يُفجر مفاجآت بالجُملة بشأن استقالة مجلس إدارة الزمالك وكواليس حديثه مع أحد المسؤولين! فيديو
كشف الإعلامي الأحمر أحمد شوبير، عن تصريحات مُثيرة على لسان مسؤول داخل نادي الزمالك، بشأن الأزمات المالية التي تعاني منها القلعة البيضاء، وحقيقة تقدم مجلس الإدارة بإستقالته.
وقال شوبير في تصريحات عبر برنامجه الإذاعي صباح اليوم الأربعاء: “يانك فيريرا برضه قلته لك امبارح خلاص بيستعد لتقديم الشكوى أو بالفعل تقدّم بشكوى ضد الزمالك عشان ما حصلش على مستحقاته. كانوا اتفقوا وهو ليه تمان شهور، اتفقوا على 220 ألف دولار، والراجل يروح وياخدهم وتمام التمام، أو يعملّهم له على شهرين أو قصتين أو تلاتة. فضل قاعد 10 أيام في القاهرة ما حصلش، سافر وتقدم بشكوى ضد نادي الزمالك”.
وواصل: “أزمة تانية… صلاح مصدق أصبح حر. هو كان عامل إنذار، والإنذار ده مدته كانت 15 يوم، إذا ما أخدش مستحقاته من الزمالك من حقه إنه يفسخ. الولد من حقه إنه يفسخ عقده مع الزمالك ويبقى حر. خلصت المهلة، ماحدش اتكلم معاه في فلوس، وبالتالي أصبح صلاح مصدق حر”.
وأردف: “المشكلة إنه مش بقى حر بس… المشكلة إنه ليه فلوس، والمشكلة إنه هيلجأ للفيفا، والمشكلة إنه هياخد حكم، وإحنا اللي هنبات فيه ونصحى فيه”.
وأشار: “يعني أنا الناس في الزمالك بيكلموني، بيقولولي يا كابتن إحنا مش هنضرب الأرض تطلع فلوس. قلت لهم: انتوا اللي اتعاقدتوا مع صلاح مصدق، وانتوا اللي اتعاقدتوا مع مشلاك، وانتوا اللي اتعاقدتوا مع يانك فيريرا. إحنا كلنا ادينا لكم كل العذر وقلنا معاكم وربنا معاكم والدنيا ماشية. وإنسانّاكم على القديم، وأشدنا تمامًا بكل اللي عملتوه”.
وأكد: “لكن… أنت اللي جبت صلاح مصدق، وانت اللي جبت فيريرا، وانت اللي جبت فلان، وانت اللي جبت مشلاك، ماحدش جابهم إلا أنت. وانت اللي جبت جروس، وانت اللي جبت جوميز… يعني كل ده في عهدك. فما هو كمان لازم تتحرك”.
واستطرد: “يعني أنا مش عارف إيه المشكلة والله، أنا مش عارف إيه المشكلة الحقيقية. هم بيقولوا لك: إحنا دفعنا فلوس كتير جدًا، وضغطنا على الناس بما يكفي إننا ندفع فلوس وإننا ناخد فلوس وإننا نتصرف في فلوس. فمش قادرين… فاض بينا”.
واختتم: “وحد قال لي – الله أعلم بصحة الكلام – إن مجلس إدارة الزمالك فعلًا تقدم باستقالته، وفعلًا تم رفضها، وفعلًا تم الحوار معاهم إنه لأ… حاولوا تجدوا حلول، وإحنا هنحاول نساعدكم بس في السنّارة مش في السمكة. إزاي بقى إنك تصطاد السمكة، هل ده ممكن ينفع الفترة اللي جاية؟ ماعنديش فكرة… لكن الله أعلم”.
ملحوظة: مضمون هذا الخبر تم كتابته بواسطة موقع اخبار الزمالك , ولا يعبر عن وجهة نظر حضرموت نت وانما تم نقله بمحتواه كما هو من موقع أخبار الزمالك ونحن غير مسئولين عن محتوى الخبر والعهدة على المصدر السابق ذكرة.
