اخبار الزمالك المصري : “أنقذوا الزمالك النادي في كارثة”! فيديو

وجّه الإعلامي مهيب عبد الهادي نداءً قويًا عبر برنامجه “اللعيب”، طالب فيه جميع المسؤولين والرياضيين والجماهير بضرورة التدخل لإنقاذ نادي الزمالك من أزمته الحالية، مؤكدًا أن الوضع بات في غاية الخطورة ولا يحتمل أي تأخير.

وقال مهيب في بداية حديثه: “من هنا من برنامج اللعيب بقول لكم كلام مهم جدًا. إلى جميع السادة: أنقذوا نادي الزمالك. الموضوع مش هزار ولا تحفيل ولا لجان ولا سوشيال ميديا. أرجوكم اقفوا جنب نادي الزمالك.”

وأضاف مهيب مؤكدًا خطورة الموقف داخل القلعة البيضاء: “بجد الموضوع خطير جدًا. قلعة من قلاع كرة القدم في مصر بتنهار ماليًا. النهارده مش وقت انتقادات، لا لمجلس الإدارة ولا لجون إدوارد ولا لأي حد. الوضع جد خطير جدًا، والوقت ده مش وقت كلام أو تصفية حسابات.”

وأردف موضحًا حجم الأزمة: “أنا بطالب كل الناس تقف جنب نادي الزمالك، بطالب الأهلاوية قبل الزمالكاوية، بطالب كل مصر. الزمالك محتاج أفكار استثمارية ومحتاج دعم حقيقي للخروج من الأزمة دي، اللي ممكن توصله لنفس مصير نادي الإسماعيلي. أنا مش بتكلم على قيمة الإسماعيلي، لكن على الظروف اللي بيمر بيها دلوقتي في الدوري.”

واستطرد قائلًا: “العمارة خلاص قايلة للسقوط. ما فيش فلوس، ما فيش فلوس، ما فيش فلوس. الناس هتعمل إيه؟ القصة مش قصة تبرعات من رجال أعمال أو أعضاء مجلس إدارة، لأ، الموضوع أعمق من كده. تخيلوا إن المدير الفني الأجنبي نفسه، يانيك فيريرا، بيقول للاعيبة: لو حد محتاج فلوس أنا أسلفه! والله أنا كنت بطالب برحيله، بس لو هو عنده الأخلاق دي، أنا أعتذر له.”

وواصل حديثه عن الأسباب الحقيقية وراء تراجع الفريق: “السبب الكبير في اللي بيحصل لنادي الزمالك هو الأزمة المالية. لازم نعترف بده، وما نحملش اللاعيبة فوق طاقتها. التجربة الإدارية فشلت، بس مش معنى كده إن نحكم عليها دلوقتي. الزمالك عنده 18 نقطة، زيه زي الأهلي والمصري. عمرها ما حصلت قبل كده.”

واستمر موضحًا: “إزاي أقول تجربة جون إدوارد فاشلة وهو نفس رصيد الأهلي؟ آه، الأهلي عنده ماتش مؤجل، بس الوضع متقارب. الأهلي عنده استقرار مادي، وده الفرق الكبير بين الفريقين.”

وأكد مهيب مجددًا دعوته للتكاتف: “تاني بطالب كل الناس تقف جنب نادي الزمالك. كلنا في الوقت ده لازم نبقى إيد واحدة، أهلاوية وزمالكاوية. تخيل يا أهلاوي إن الزمالك بينهار، هتفرح في إيه؟ وتخيل يا زمالكاوي لو مافيش أهلي، هتفرح بإيه؟ الكورة هتفقد طعمها والمنافسة هتختفي.”

وشدد على أهمية الزمالك في الكرة المصرية والعربية: “حرام الزمالك قامة كبيرة وجماهيره بالملايين مش في مصر بس، في الوطن العربي كله. ما تحملوش اللاعيبة أكتر من طاقتها. الأزمة المالية دي ممكن تضيع تاريخ نادي كامل. في أندية عريقة في أوروبا انهارت بسبب نفس الظروف.”

واختتم مهيب عبد الهادي حديثه برسالة مؤثرة: “أي حد سامعني دلوقتي، اقفوا جنب نادي الزمالك. سيبوا الميول شوية وخلي عندكم وقفة يذكرها التاريخ. حتى الأهلي، لازم يقف مع الزمالك، لأن ده المنافس الحقيقي، اللي بيكسبك وبيفرحك وبيخليك تحس بطعم الكورة. الكورة من غير منافسة ما ليهاش معنى.”