اخبار الزمالك المصري : شوبير يعتذر لـ عمرو زكي وأسرته.. ويُصرح: “بعد كده متشتكوش”! فيديو

ردّ الإعلامي أحمد شوبير على الجدل الذي أُثير مؤخرًا حول تصريحاته بشأن الحالة الصحية للنجم السابق عمرو زكي، موضحًا تفاصيل ما قصده ومؤكدًا أنه تحدّث بدافع إنساني فقط دون أي نية لإثارة الجدل.

قال الإعلامي أحمد شوبير في تصريحاته عبر برنامجه الإذاعي: “الأسابيع اللي فاتت، قلت يا جماعة خدوا بالكم من عمرو زكي، واسألوا عن عمرو زكي. للأسف لقيت البعض طالع يهاجم ويقول: ليه بتتكلموا عن الموضوع؟ وليه بتدخلوا الأهلي والزمالك؟ وليه بنعمل كده؟”.

وتابع: “يا جماعة، إحنا ما عملناش حاجة غلط. القصة ببساطة إنّي كنت قاعد مع شخص مهم في نادي الزمالك، ومقرّب جدًا من الكابتن عمرو زكي، وزميله لفترة طويلة، وقال لي: يا كابتن، لازم نعمل حاجة لعمرو زكي”.

وأضاف: “سألته: ماله؟ قال لي: في محنة كبيرة ولازم نقف جنبه ونساعده. وشرح لي الحالة، فقلت: الراجل في محنة ولازم نقف معاه. دي القصة كلها من أولها لآخرها، جتني من شخص مهم داخل نادي الزمالك ومقرّب جدًا من عمرو زكي.”

وتابع شوبير قائلًا: “لكن لو الكابتن عمرو بخير، وصحته تمام، وحالته كويسة 100%، فأنا بعتذر له وبعتذر لأسرته ولكل الناس. بس بقول في نفس الوقت: ما تجوش بعد كده وتقولوا إن محدش سأل أو محدش اهتم.

وأتم: طالما الكابتن عمرو نفسه بيقول إن الدنيا تمام، خلاص يا عم، الدنيا ربيع والجو بديع، نقفل على كل المواضيع، وأنا أول واحد هاقول نقفل على كل المواضيع”.