اخبار الزمالك المصري : انقذوا النادي من المصيبة”! فيديو

في مفاجأة مدوّية فجّرها الإعلامي مهيب عبد الهادي، كشف عن أزمة مالية طاحنة داخل نادي الزمالك قبل أيام قليلة من مباراة القمة أمام الأهلي، مؤكدًا أن لاعبي الفريق لم يحصلوا على مستحقاتهم منذ أكثر من ثلاثة أشهر، وأن استمرار هذا الوضع قد ينسف طموحات الجماهير في اللقاء المرتقب.

وقال شوبير في تصريحات عبر برنامج “اللعيب” على قناة “mbc masr”: “امبارح كان في رد فعل قوي جداً جداً على خبر يانيك فيريرا. وقلت إنه قعد مع اللعيبة وعمل جلسة والفلوس والحكاية والرواية. الناس فهمت، بعض الناس فهمت الكلام غلط. وانتقدت الراجل؟ لا حرام. الراجل ما قالش فيما معناه اللي ما يلعب، اللي عايز يلعب ييجي هنا واللي مش عايز يلعب ييجي هنا”.

وتابع: “هو ما قالش كده كان كلامه عادي جداً. وهو كان بيرفع الضغط عن اللعيبة. إن انتوا طبعا عشان أزمة المستحقات وما خدتوش فلوسكم فاللي مش مركز يعني براحتكم”.

وأضاف: “أنا عايز أقول لكم حاجة. لاعيبة الزمالك للآمانة رجالة. أنا باكد ليه؟ لأن كان امبارح جالي تليفونات كتير من ناس مسؤولة، يعني في ناس مسؤولة، يعني مش عايز أقول أسماء. ما بحبش أقول القصة دي إن أنا كلمت فلان وعلان أو فلان كلمني أو أو أو أو مش بحبش أقول الكلام ده. لكن إلى من يهمه الأمر، إلى من يهمه الأمر”.

وأردف: “في ناس كتير جداً بتطلع بتقول أنا بحب الزمالك. آه والزمالك ورجال أعمال الزمالك دلوقتي محتاج كل واحد منكم. يعني إيه؟ يعني بعد ما تسمع الكلام ده تتصل بالناس في الزمالك انتوا إيه المشكلة اللي عندكم؟ لأن الزمالك في مشكلة حقيقية قبل مباراة القمة”.

واستكمل: “وهقول لكم على مفاجأة. فيريرا اتكلم الساعات الماضية مع إدارة الزمالك لازم اللعيبة تاخد فلوسها قبل مباراة القمة. مالناش دعوة بقى ولا مشكلة أرض ولا مشكلة معرفش إيه. من الكلام اللي جالي امبارح اللعيبة دي أبطال. ما بياخدوش فلوس بقى لهم ثلاث شهور. ما بياخدوش جنيه. انت متخيل لاعب في الملعب بيلعب وبيته مثلاً محتاج، هيركز إزاي يا جماعة؟”.

وأشار: “الراجل حتى المدير الفني جاله عرض من بلجيكا من أسبوعين ورفض. رغم إنه ما بياخدش فلوسه. عشان حابب يكمل”.

واستكمل: “فنداء إلى كل زملكاوي معاه يعني رجل أعمال أو بيحب نادي الزمالك، مش عايز أقول بقى معاه ولا معاهوش. نادي الزمالك أكبر من كده. لكن نادي الزمالك دلوقتي محتاج اللي بيحبه”.

وشدد: “لو اللعيبة ما خدتش فلوس قبل مباراة القمة، أنا بقول لجماهير نادي الزمالك لا تنتظروا أي شيء ولا عتاب لهذه الفرقة. وهؤلاء اللاعبين الأمور واضحة. أنا ما أحبش أكشف حد قال لي حاجة لكن الأمر جلل. آه الأمر جلل”.

وأكد: “فين بقى الأستاذ ممدوح عباس رجل المهام الصعبة، هيظهر ولا مش هيظهر، ولا هيكتفي بما سبق؟ هو عمل كثير خلي بالكم. طيب فين سبع ثمان رجال أعمال اللي موجودين في مجلس إدارة نادي الزمالك؟ ده وقتكم. وقتكم هتظهروا إمتى؟ فين الناس اللي بتطلع تتكلم ونادي الزمالك والعشق والكيان وهم رجال أعمال؟ ارمِ بياضك. ارمي بياضك الفريق محتاج وعنده مشكلة كبيرة وعندك مباراة قمة”.

واختتم: “ليه أنا بقول كده مباراة قمة؟ عشان جماهير نادي الزمالك المباراة دي بالنسبة لها كبيرة جداً بطولة. إيه يعني مباراة بثلاث نقاط؟ لا، ده بطولة ومفترق طرق. أنا عملت اللي عليا. انقذوا نادي الزمالك لو حابينَه، لو بتحبوه”.