حسام المندوه: الزمالك يمر بأصعب مرحلة في تاريخه.. لكن النادي لن يموت

أكد الدكتور حسام المندوه، أمين صندوق نادي الزمالك، أن النادي يواجه واحدة من أصعب الفترات في تاريخه بسبب الأزمات المالية والإدارية المتراكمة، لكنه شدد في الوقت نفسه على أن الزمالك سيبقى دائمًا قويًا ولن يسقط أبدًا.

وقال المندوه خلال تصريحاته عبر قناة “أون إي”: “استخدمت تعبير صعب لما قلت إن الزمالك يموت، لكن الهدف كان تسليط الضوء على مشكلة حقيقية بيمر بيها النادي حاليًا، بالتأكيد مفيش حد يقدر يختلف إن الزمالك عنده أزمة مالية قوية جدًا، وهذا متزامن مع أزمة إدارية كمان، لكن رغم كل ده، إحنا عندنا إصرار نكمّل وننقذ النادي”.

وتحدث المندوه عن الفترة السابقة، قائلًا: “لما جينا لإدارة الزمالك، مرينا بظروف صعبة جدًا، وقعدنا سبعة أشهر كاملة مش عارفين موقفنا القانوني، هل إحنا مستمرين ولا ماشيين، بسبب طعون قضائية كانت مقدمة من ناس بينتسبوا للنادي”.

وتابع: “الطعون دي كانت من شهر أكتوبر 2023، والمحكمة حكمت في النهاية لصالحنا، وده أعاد الاستقرار النسبي لمجلس الإدارة بعد فترة طويلة من الترقب والتشتت”.

وأوضح أمين الصندوق أن المجلس بدأ العمل الجاد بعد انتهاء فترة الطعون، قائلًا:  “السبع شهور دول ما راحوش هدر، لكنهم عطّلونا شوية عن شغلنا الحقيقي. وبعد ما اتحسم الموقف، بدأنا نفكر بجدية، نعمل إيه علشان نرجّع الزمالك لمكانته، خصوصًا إن الكل كان بيقول إن دي أصعب مرحلة في تاريخ النادي”.

واختتم المندوه تصريحاته برسالة طمأنة لجماهير الزمالك، مؤكدًا أن الأمل ما زال قائمًا رغم صعوبة المرحلة، وقال: “إحنا عارفين إن جماهير الزمالك موجوعة وقلقانة، لكن بنوعدهم إننا مش هنستسلم، والزمالك هيفضل واقف على رجله، وهيعدّي المرحلة دي زي ما عدّى فترات أصعب قبل كده”.