اخبار الزمالك المصري : هل يفاوضه الأهلي وبيراميدز؟.. شوبير يعلق على مصير محمد السيد مع الزمالك وينتقد الجماهير! فيديو

تحدث الإعلامي أحمد شوبير في تصريحات عبر برنامجه الإذاعي صباح اليوم عن أزمة التجديد لأحد لاعبي الزمالك، منتقدًا الهجوم على الإدارة والجهاز الفني، وموجهًا رسالة لجماهير القلعة البيضاء.

وقال شوبير: “عايز أسأل سؤال… هو الزمالك تفاوض ولا ما تفاوضش؟ الزمالك عنده أزمة مالية طاحنة، طب هيدفع منين بس يا جماعة؟ النهارده الولد لعيب كويس ومطلوب، وأنا شخصيًا شايفه لعيب هايل”.

وواصل: “هل فعلًا الأهلي بيفاوضه؟ معرفش، بس ممكن. هل بيراميدز بيفاوضه؟ برضه ممكن. هل في أندية تانية منتظمة ماديًا بتكلمه؟ احتمال”.

واستمر: “بس في النهاية يا جماعة الولد ده منتمي ومن ناشئين نادي الزمالك، حاجة جميلة وزي الفل، لكن في الآخر طبيعي يسأل: طب ادّوني عرض، قولوا لي هتدّوني كام؟ اللعيبة لسه ماخدتش فلوسها لحد دلوقتي، وهو بيقول عندي عروض احتراف برا، فليه ما تقعدوش معاه وتكلموه في التجديد؟”

وتابع شوبير: “الراجل فيريرا عمل حاجة هايلة من وجهة نظري، الماتش كان محسوم من الأول 6-0، وسأل اللي جنبه إيه اللي بيحصل، قالوله الجمهور بيهاجم محمد السيد، فجتله ضربة جزاء تانية، قاله: خش شوّطها، لو دخلت خير وبركة، ما دخلتش مش مشكلة، إحنا كسبانين كده كده”.

وأشار: “وبرضه الناس هاجمته، وهاجموا جون إدوارد! طب هو الولد ده لو ما جدّدتوش له، هتمشيه؟ هتهمّشوه؟ ولا هتستجيبوا بقى وتدخلوا في خناقة مع الجمهور؟ ما هو برضه مش من مصلحة الجهاز الفني يخش في خناقة مع الجماهير، خصوصًا إن دلوقتي الكل بيخاف من رد فعلهم، حالة رعب بقت موجودة.”

وأضاف شوبير: “يا جماعة، ممكن الجمهور ما يكونش عنده كل التفاصيل، يعني ما يعرفش الصورة كاملة من أولها لآخرها. فالهجوم بالشكل ده كان أوفر جدًا ومبالغ فيه.

واستمر: “وبعدين هو محمد السيد لعب كام ماتش السنة دي مع الزمالك؟ ما لعبش كتير، والماتش ده أصلاً كان سهل وإنت كسبان ستة، يعني المفروض الأمور تبقى أهدى شوية.”

واستكمل كلامه قائلًا: “منين بنطالب الناس تقف جنب الزمالك وتسانده، ومن ناحية تانية بنهاجم في الإدارة واللاعيبة؟ سيبوا الأمور دي لمجلس الإدارة”.

وأردف: “يا سيدي، لو جدد خير وبركة، ما جددش، الزمالك عمره ما هيقف على لعيب. والله الموضوع بسيط جدًا، ومش عارف الناس مكبّراه ليه ومكهرباه بالشكل ده، لا محتاجة كهربا ولا تصعيد، خالص.”

وأكمل شوبير: “أنا بقول رأيي اللي أتمنى الناس تفكر فيه، مش لازم تعملوا بيه، بس فكروا: اللي أنا بقوله ده لصالح نادي الزمالك ولا ضده؟ هل من مصلحتي أحافظ على لعيب كويس عندي؟ أكيد. هل من مصلحتي أحاول أخلص الأزمة المالية عشان أقدر أجدد لعيبتي؟ طبعًا”.

وتابع: “عندي لعيبة قدمت شكاوى، طب ليه محدش اتكلم عنهم؟ هو قالك ده حقهم، وغصب عنهم، ما هو طبيعي عايزين يستقروا ويقبضوا فلوسهم.”

واختتم شوبير كلامه برسالة للجمهور: “الاستقرار بييجي من الجمهور، من دعمه ومساندته. وأنا بتمنى إن جماهير الزمالك تدعم فريقها وتقف جنبه، لأنهم بصراحة يستاهلوا ده، يستاهلوا الدعم والتشجيع الحقيقي.”