اخبار الزمالك المصري : مذيع قناة الزمالك يوجه رسالة قوية لمجلس الإدارة.. “كلموا الناس لان الجمهور طهق”
وجه محمد عبدالجليل “جاليليو”مذيع قناة الزمالك، رسالة هامة لمجلس إدارة النادي برئاسة حسين لبيب بشأن الجماهير.
وقال عبد الجليل، خلال تصريحات تليفزيونية عبر برنامج” زملكاوي”، على قناة “الزمالك”:” أنا مش فاهم حالة الإحباط اللي عند الناس دي هتفضل لحد إمتى؟، أنا مش بلوم الناس، لأن كل الأخبار اللي واصلالهم أخبار تسد النفس بصراحة”.
وتابع:” كل يوم نسمع فلان بيفسخ، فلان ماشي، فلان طالب كذا، اقفلوها وهاتوا ضبة، هو مين اللي يتقفل ومين اللي يجيب ضبة ومفتاح؟ أنا مش قادر أفهم الجملة دي أصلًا”.
وشدد عبد الجليل:” طريقة مخاطبة الرأي العام ليها فن، واسمحولي أقول كده لمجلس إدارة الزمالك، أرجوكم صدّروا أمل للناس، حتى لو الصورة سيئة، إحنا عارفين إنها سيئة”.
وأكمل:” الزمالك ما بيقفلش وما بينتهيش، وده لازم يوصل للجمهور، لازم نصدر تفاؤل شوية، مش كل حاجة سودة وسد نفس”.
وواصل عبد الجليل: “حتى في عز الأزمة، ما تبعدوش الناس ولا الرأي العام عنكم، حاولوا تلمّوا الجمهور حواليكم مش تسيبوه محبط وقرفان”.
وأشار:” أنا مثال قدامكم راجل بشجع برشلونة: خوان لابورتا في برشلونة في ولايته الثانية زي كابتن حسين لبيب ما هو فتره مؤقته وفتره منتخب، لابورتا دايمًا كان بيطلع يدي أمل”.
وأستأنف عبد الجليل:” لابورتا قعد يقول لهم كامب نو خلص، اعتبر خلص يا باشا، طب إيه؟ قال لهم ده مشروعنا العظيم الرائع العتيق اللي هيعمل كل حاجة، طب هيخلص 2023؟ آخره نتقابل رأس السنة، عدى 23 ها 24 يا باشا ما تقلقوش 24 الموضوع هيخلص، عدى أيام، أسابيع، شهور، دايماً في أمل، وكامب نو في الآخر خلص إمتى؟ ومش كله كمان، من شهرين بس”.
واردف: ‘”فأنت بتتكلم على إنك حتى في عز الأزمة لازم ما تبعدش دائرة المقربين ودائرة الرأي العام عنك، حاول تلملم الناس حواليك”.
واستطرد عبد الجليل:” يعني أنا سمعت قبل كده تصريحات وكانت هنا معانا للأستاذ محمد طارق عضو مجلس الإدارة ‘إحنا عاوزين نقرب الناس’، إحنا عارفين إن في أخطاء، إحنا عارفين إن في مشاكل وإحنا زي ما أنتم بتقولوا كده عارفين إن في حاجات خارجة عن إرادة حضراتكم، لكن في النهاية فكرة إن الجمهور يبقى محبط وقرفان ومتضايق وبائس، ليه يا جماعة؟ ليه يا جماعة؟”
وأختتم: “آه ماشي إحنا في أزمة بس لازم يبقى في خطاب إيجابي شوية مش كل حاجة سد نفس للناس، لو في حاجات إيجابية اطلعوا قولوها يا جماعة، لو في حلول ولو مؤقتة اطلعوا بشروا الناس، لو في خطة لشيء اطلعوا يا جماعة قولوا، خصوصاً لو بالفعل في بعض الأمور الإيجابية، يا أخي إدي الناس طاقة لأن الجمهور زهق وطهق، فإحنا مش عايزين نوصل الناس إلى هذه المرحلة”.
ملحوظة: مضمون هذا الخبر تم كتابته بواسطة موقع اخبار الزمالك , ولا يعبر عن وجهة نظر حضرموت نت وانما تم نقله بمحتواه كما هو من موقع أخبار الزمالك ونحن غير مسئولين عن محتوى الخبر والعهدة على المصدر السابق ذكرة.
