اخبار الزمالك المصري : “متربي كويس ومش بكذب”.. ورسالة حادة لعبد الواحد السيد ووصف أيمن عبد العزيز بـ “الفاشل”! صورة

شنّ محمد أشرف روقا، لاعب الزمالك السابق، هجومًا لاذعًا على بعض مسؤولي القلعة البيضاء، بعدما خرج عن صمته وردّ للمرة الأولى بشكل علني، مؤكدًا تمسكه بموقفه ودفاعه عن تاريخه، وذلك عبر حسابه الرسمي على موقع التواصل الاجتماعي «إنستجرام».

وكتب محمد أشرف روقا عبر حسابه الرسمي بموقع “إنستجرام”: “أنا أول مرة أكتب حاجة وأعلّق على موضوع أنا قولته، أو أرد على حد وأذكره باسمه، وهنا كلامي للكابتن عبد الواحد السيد”.

وتابع: “حضرتك عارف أنا بحبك إزاي وبحترمك إزاي، وده البند اللي في عقدي، واللي حضرتك قلت إنه مش موجود أو إن البند ملوش علاقة بالفسخ من طرف واحد، وحضرتك بتقول المفترض إني شخص متربي، لا هو ده مش مفترض، أنا الحمد لله متربي ومتربي كويس جدًا، ومش مستني حد يقول ده متربي ولا لا، وحضرتك عارف إني مليش في الكذب والتحوير”.

وأضاف: “أما الشخص التاني فهو كابتن أيمن عبد العزيز، حضرتك بتقول إن لما جيت نادي الزمالك جيت النادي من لا شيء، أنا مش مشكلتي إن حضرتك متعرفش حاجة، أنا قبل ما أجي نادي الزمالك الحمد لله أنا معدّي الـ100 ماتش”.

وواصل: “ربنا كرمني ولعبت منتخب أوليمبي مع كابتن حسام البدري، وربنا كرمني وروحت منتخب مصر مع كوبر، فأنا الحمد لله مروحتش نادي الزمالك من لا شيء، تاني حاجة أنا مبقدمش حجج زي ما بتقول، مليش أنا في الجو ده خالص، وإنت عارف أنا مين وابن مين، ومليش في الهجايص اللي بتتكلم فيها”.

وأردف: “وأنا مش مستني إني أشوف الناس بتهاجم حد علشان أطلع أتكلم، إنت بتقول إني خدت فلوس 6 سنين، مجتش من سنة؟ لا، هو حضرتك متعرفش حاجة برضه وبتتكلم بس، ومتعرفش إني كنت بقعد فترات بـ5 و6 شهور ميدخلش بيتي جنيه”.

واختتم: “أما بالنسبة لحوار جوميز، فأنا مش محتاج أتحجج، ولا أَهري زي ما إنت طالع تتكلم في حاجات متعرفهاش، ربنا بس وحده اللي يعلم إذا كنت بكذب أو صادق، فإنت متطلعش تقول أي كلام فارغ عني وإنت متعرفش حاجة، واه ركز في شغلك بدل ما إنت كل فرقة بتمسكها بتفشل وبعد كده تمشي”.