اخبار الزمالك المصري : “لفتة إنسانية رائعة”.. مباراة خيرية لنجوم الزمالك السابقين لصالح أسرة الراحل محمد صبري

كشف خالد جلال، نجم الزمالك السابق، عن لفتة إنسانية طيبة من أبناء القلعة البيضاء، تجاه أسرة الراحل محمد صبري، مُشيرًا إلى البدء في إجراءات إقامة مباراة خيرية لدعم أسرة الراحل، بحضور نجوم الزمالك السابقين.

وقال خالد جلال في تصريحات عبر برنامج “اللعيب”، على قناة “إم بي سي مصر”: “طبعًا بننعي الكرة المصرية في وفاة كابتن محمد صبري، واحد من أبرز اللاعبين في تاريخ الكرة المصرية. يمكن ما أخذش حقه كاملًا كلاعب، لكن محمد صبري كان من اللاعبين الموهوبين جدًا. اتشرفت أني كنا في جهاز واحد في نادي الزمالك وخدنا بطولة مع بعض، بطولة السوبر في 2017”.

وتابع: “في الحقيقة، محمد صبري، جنازته واليوم اللي اتعمل له، يبين لك مدى حب الناس كلها لمحمد صبري واحترامهم وتقديرهم لتاريخه. وحتى أنا بشكر النادي الأهلي والكابتن محمود الخطيب، وحتى إسلام الشاطر وأسامة حسني وكل الناس في جهاز النادي الأهلي، كابتن وليد صلاح الدين، الكابتن سيد عبد الحفيظ، كل الناس اللي حضرت”.

وأضاف: “في الحقيقة، نادي الزمالك ده وضع طبيعي إن إحنا نحضر كلنا ونقف جنب صبري، لكن دي لفتة طيبة تعكس أننا قاعدين هنا عشان ننبذ التعصب. أنا بتكلم بس في الحتة دي عشان ننبذ التعصب، ودي حاجة متابعة”.

وأشار: “حاجة تانية بنعملها إن شاء الله، اجتماع في بيت الكابتن أيمن يونس. وفي الحقيقة، أيمن يونس من الشخصيات اللي بتلم نجوم نادي الزمالك. هنعمل حاجة مهمة جدًا في حضور الكابتن أبو رجيله، والدكتور محمود سعد، وكل الناس.. هنقعد وبنفكر إن إحنا نعمل مباراة للكابتن محمد صبري، مباراة خيرية نجوم الأندية ضد نادي الزمالك، وهناخد موافقات إن شاء الله، والجواب هيخرج من نادي الزمالك، والمباراة في ظرف عشرة أيام”.

واختتم: “هنشوف برضه واحد زي علاء علي، واحد زي كابتن سعيد الجداوي، الجماعة ناس كتيرة جدًا، بشير عبد صمد، أدهم السلاحدار، إيهاب جلال، ناس كتيرة قوي اتظلمت في الكرة وما أخذتش حاجة. اللعيبة بتاخد حاجة، عايزين يبقى في حاجة متابعة إن إحنا نعمل حاجة للناس اللي فقدناها دي وبصورة مفاجأة، الناس دي لازم نقف جنبها”.