اخبار الزمالك المصري : لاعبو الزمالك مديونين.. وخلافات قوية في مجلس الإدارة!

فجر الإعلامي مهيب عبد الهادي مفاجأة صادمة، بعدما كشف أن لاعبي الزمالك وصل بهم الحال إلى الاستدانة لتغطية التزاماتهم المعيشية، بسبب تأخر الرواتب وعدم حصولهم على مستحقاتهم.

قال مهيب عبد الهادي عبر برنامج “اللعيب”: “هقول لكم على مفاجأة بقى، اللعيبة وصلت يا جماعة إنها بتستلف. لاعيبة الزمالك بتستلف فلوس عشان ما هو أنت بتقبضهم شهري، والناس عليها أقساط وعليها إيجارات وعليها حاجات والتزامات ومدارس موسم مدارس. يعني ما خدوش مرتب 7 و8 وادينا، اهو 9 بيخلص. يعني هم أساسا عقودهم ما فيهاش مقدمات. عملت نظام جديد بقى في راتب كل شهر (فاديني راتبي، الله اديني راتبي)”.

وتابع: “أهو الفرقة اتغلبت من الأهلي، وكان المفروض يعني كان في الإمكان أفضل مما كان. إيه اللخبطة دي؟ حاجة حاجة يعني الزمالك، يعني حاجة لا حول ولا قوة إلا بالله. مفيش حد ماسك العصاية كده بيوزع الأدوار والورق كله متلخبط”.

وأضاف: “ممدوح عباس بقى زعلان ليه؟ الفترة اللي فاتت تبرع حوالي 30 مليون عشان مرتبات لاعبي الكرة. تقريبا بيبقى في احتياجات أخرى وألعاب أخرى وحاجات أخرى. فرق الناشئين اتوزعت كده فزعل. (أنا مديتكم الفلوس دي عشان الفريق الأول يعني)”.

واختتم: “يعني الزمالك محتاج يا جماعة محتاج حبوا الزمالك شوية، يعني حبوا الزمالك شوية وحبوا بعضكم شوية. مجلس جاي بقائمة واحدة وكله خلافات من الآخر وكله عارف، يعني ما فيش حاجة مستخبية. مكتب تنفيذي بيعاد تشكيله ليه؟ مالناش علاقة، ما فيش مشكلة، مالناش دعوة، لكن ده واضح بقى على الفريق. فريق خسر 10 نقاط، في المقابل إن الـ10 نقاط دول كانوا في المتناول. مين المسؤول عن الكلام ده؟”.