اخبار الزمالك المصري : شوبير يثور على الهواء بسبب ما تردد عن زيزو.. واستثمار كريستيانو رونالدو في الزمالك! فيديو

علق الإعلامي أحمد شوبير على ما تردد مؤخرًا بشأن طلب أحمد سيد زيزو لاعب الأهلي خوض فترة تأهيل خارج مصر بسبب إصابته، وكذلك الأنباء التي زعمت رغبة النجم البرتغالي كريستيانو رونالدو في الاستثمار داخل نادي الزمالك

وقال شوبير عبر راديو أون سبورت صباح اليوم الخميس: “عندي خبرين مهمين اتقالوا خلال اليومين السابقين، يعني بصوا كل الناس بتجتهد في الأخبار، كل مرة بقول كده يعني، لكنه الاجتهاد برضه له بعض الحدود، يعني حد خلاص اجتهد أو حد سرّب لحد خبر غير صحيح، عليك أن تتريّث كده وتفكر وتفلتر، وبعد كده تبقى تقول الخبر ده صح ولا غلط أو تبقى تنقل هذا الخبر”.

وتابع: “الموضوع ده يا جماعة مهم جدًا، لأن كلنا بنقع في نفس الخطأ، يعني فيجي مثلًا يقول لك إيه: إنه زيزو طلب إنه يتأهل خارج مصر. ليه؟ لا سمح الله عنده إصابة! إيه عنده؟ شد من الدرجة الثانية. اللي هو بياخد وقت قد إيه؟ أسبوعين، تلاتة، شهر مثلًا؟ يعني هو من أسبوعين لتلاتة، طالما شد من الدرجة الثانية حسب درجات الشد”.

وأضاف: “طيب هل حضرتك شفت إنه في إصابة شد حد بيروح يتأهل بره مصر؟ يعني حضرتك شفتها؟ ما شفناهاش. طب زيزو هل ده لعيب صغير إن ممكن يروح يطلب مثل هذا الطلب؟ صعب. ماشي، طيب أوكي، يبقى إحنا نتريّث قبل ما ناخد خبر ونحطه ونقوله، عشان يعني في أخبار تتصدق وأخبار ما تتصدقش. فده من ضمن هذه الأخبار”.

وواصل: “يعني أنا قصدي واحد مثلًا، أنت راجل عندك موقع أو عندك صفحة أو عندك مش عارف إيه، والراجل الصحفي اللي عندك أو الراجل الأدمن اللي عندك راح حط خبر، يعني أنت نفسك شيله، ده الطبيعي يعني. طب إذا أنت ما شلتوش أو أنت مش مركز، يبقى أو أنت عندك موقع أو برنامج أو حاجة وحد طلع قال خبر يعني غير صحيح، يعني انت خلي بالك عشان الدنيا ما تمشيش بشكل غلط يعني”.

وأضاف: “طيب، الحاجة التانية: لما برضه حد يطلع يقول معلومة، جات له معلومة إنه كريستيانو رونالدو هيستثمر في نادي الزمالك، وإنه عايز يستثمر في المنطقة في كل نادي. أولًا ده مستحيل يحصل، يعني هو حد يا عيني قال الخبر، فحد شاف، حد تاني شاف إن الخبر ده حاجة جميلة جدًا فأنا آخده أعرف أعمل بيه شغل كويس، يعني هو مادة، داتا. طبعًا لو الخبر ده صحيح داتا كويسة. لكنه إيه اللي هيجيب كريستيانو لمصر؟ وإيه اللي هيوديه الأردن؟ وإيه اللي هيوديه العراق؟ وإيه اللي هيوديه في السعودية؟ ده هو راجل 100 فل و14، وآه في نظام شراكة مع النصر السعودي، قعدت أقرأ فيه امبارح ما فهمتوش، يعني ما فهمتش القصة شكلها عاملة إزاي”.

وأردف: “وعلى فكرة ممكن يكون ده في حكاية أسهم أو موضوع أو حاجة بس فقط لا غير، يعني لكن النصر السعودي ده نادي ثقيل، يعني من الأندية الثقيلة في السعودية. يعني بتتكلم على الهلال، بتتكلم على النصر، بتتكلم على الأهلي، دول الثلاث أندية اللي هم التقيل قوي قوي في السعودية، وبعد كده بقى عندك كتير جدًا من الأندية ما بين الشباب وما بين الاتفاق وكثير من الأندية في المملكة العربية السعودية الشقيقة”.

واستكمل: “فناخد بالنا يا جماعة وإحنا بنقول مثل هذه الأخبار. فأنا عجبني الحقيقة إن المهندس هشام نصر نائب رئيس نادي الزمالك طلع نفى هذا الأمر جملة وتفصيلًا. قد يكون الزميل زي ما بقول لحضراتكم أو قد تكون الصفحة حد سرّب لها هذا الأمر، يعني هم بس ياخدوا بالهم يحسبوها الأول بشكل جيد. يعني نمرة اتنين: لازم تحسب حساباتك وأنت بتقول الخبر، ده مهم قوي”.

واختتم: “فنمرة تلاتة الناس هيقول لك بقى: شوف الزمالك وكريستيانو ضحك على الزمالك. ما هو أصلًا ما فيش، ما هو أصلًا ما فيش موضوع، فضحك على الزمالك في إيه؟ هو مفيش. إحنا بقى هناخدها بقى إنه كل الناس تمشي في قصة، وده مش حلو. يعني فأتمنى إن الحاجات دي ناخد بالنا منها”.