اخبار الزمالك المصري : جمال عبد الحميد يشيد بهؤلاء في الزمالك.. ويعلق على التعادل أمام الجونة

أشاد جمال عبد الحميد، نجم الزمالك، ببعض لاعبي الفريق الأول لكرة القدم بالفارس الأبيض، وعلق على التعادا أمام الجونة، ضمن منافسات بطولة الدوري المصري الممتاز.

وقال عبد الحميد، خلال تصريحات متلفزة، ببرنامج “ملعب أون”، عبر قناة “أون سبورت”:” رأيك في أداء الزمالك؟ هو النهارده كماتش كان كويس فنيًا، إنما كنتيجة وحشة جدًا جدًا”.

وتابع: “كان في فرصة حلوة جدًا إنك تسبق وتستمر مع الأداء اللي قبل كده في الماتشين اللي فاتوا، وتبعد ويبقى ماتش الأهلي على الأقل نازل مرتاح، حتى لو تعادل هتفضل بنفس الفرق. فطبعًا الماتش ضايق كل الزملكاوية”.

وأردف عبد الحميد:” لأن الزمالك قصاد المقاولين، وصاد وادي دجلة، وصاد الجونة خسر كتير. يعني خسر 3 نقاط من دجلة، و2 من المقاولين، و2 النهارده. يعني 7 نقاط مالهمش لازمة. مع فرق أنا على دماغي ومحترمة، لكن ده نادي الزمالك اللي فيه نجوم كبار وجماهير بتشجع الفريق بكل قوتها، وبتدفع أي لاعب إنه يلعب 90 دقيقة بأقصى ما عنده”.

وردا على سؤال هل الزمالك به نجوم كبار الآن؟ اجاب:” حاليًا طبعًا فيه نجوم كبار. أنا بعتبر عبد الله السعيد وعمر جابر نجوم كبار وأساسيين، ومعاهم ناصر ماهر، ما شاء الله لاعب بيعرف يفك أي طلاسم لأي فرقة”.

وشدد عبد الحميد: “وكمان ناصر منسي، أنا بعتبره لو خد فرصته أكتر هيبقى هداف الدوري. هو أصلاً جه من البنك الأهلي وكان هداف الدوري، رغم إن البنك الأهلي مش بينافس على البطولة.

وأكمل:” وطبعًا في لعيبة كويسة كتير. الزمالك فيه نجوم كبار، النهارده مثلًا دونجا لما خرج ظهر الفرق الكبير. كل الناس بتقول مستواه قليل، لكن لما خرج بان قد إيه الزمالك محتاجه. لا، دونجا لاعب كويس جدًا، ومن الأساسيات في الزمالك”.

وأختتم: “وفي نجوم تانية زي عدي الدباغ، كل يوم بيزيد ويتطور، وكمان خوان بيزيرا ده هيبقى فلته في الكورة المصرية، لكن موضوع إن اللاعب يتعمد الحصول على بطاقة صفراء في المباراة الماضية لكي يشارك في مباراة الأهلي ده 50% إيجابي و50% سلبي”.