اخبار الزمالك المصري : تعليق ناري من شوبير على استقالة حازم إمام من الجهاز الفني لـ الزمالك وكواليس القرار! فيديو

كشف الإعلامي أحمد شوبير تفاصيل استقالة الكابتن حازم إمام من الجهاز الفني لنادي الزمالك، مؤكدًا أن الأمر لا يتعلّق بخلافات أو أزمات كما تردّد، بل جاء بقرار محترم من حازم نفسه بعدما شعر بعدم وجود دور واضح له داخل الجهاز الفني.

وقال شوبير في تصريحات إذاعية اليوم: “امبارح الحقيقة لقينا خبر إن الكابتن حازم إمام استقال من الجهاز الفني للفريق الأول في نادي الزمالك، أو إنه ممكن يكمل في الجهاز، فخلوني أوضح كذا حاجة، ومعظمها — لو مش كلها — إيجابية جدًا.”

وأضاف: “أنا كنت قايل من كام يوم إن الزمالك لو بيفكر يقوّي الجهاز الفني، لازم يكون فيه حد تقيل موجود جنب المدرب يانك فيريرا.”

وتابع: “كمان مباراة الزمالك الودية اللي فاتت، رغم إنها سهلة، بس ادّت مجلس الإدارة وجون إدوارد وفريرا نفس كويس جدًا، وخلّتهم يقدروا يتكلموا بثقة أكتر.”

واستطرد قائلًا: “أول ما اتقال إن حازم إمام استقال، بدأ الكلام بقى: خلافات، خناقات… لأ، مفيش الكلام ده خالص.”

وأردف: “بصراحة عجبني جدًا تصرّف حازم إمام الصغير، راح كاتب كلمتين محترمين جدًا، شكر فيهم مجلس الإدارة وجون إدوارد، وقال إنه عمره ما هيقول كلمة تسيء لنادي الزمالك اللي اتربى فيه، واللي له فضل كبير عليه وعلى كل اللاعيبة اللي لعبت فيه.”

واستكمل: “وقال كمان إنه ما لقاش لنفسه دور واضح، فقرّر يقول: سلام عليكم بكل احترام.”

واختتم شوبير تصريحاته قائلًا: “يعني الراجل بنفسه طالع بيقول كده، نطلع إحنا نكدّبه ونألف روايات مالهاش لازمة ليه؟ خلونا طبيعيين يا جماعة، ونخلي الأمور تمشي بسلاسة ومن غير تهويل”.

واختتم: “أنا شايف إن اللي حصل طبيعي جدًا، ومفيهوش أي أزمة، فخلّونا نحترم اللي الراجل قاله ونوقف الكلام الزايد.”