اخبار الزمالك المصري : بيراميدز أخذ مكان الأهلي.. ومش مشكلتي إن الزمالك مش معاه فلوس!

أكد باسم مرسي، لاعب الزمالك السابق، أن الفوارق المالية الضخمة بين الأندية هي السبب الرئيسي في ابتعاد الزمالك عن المنافسة خلال السنوات الأخيرة، مشيرًا إلى أن ميزانية بعض الأندية، وعلى رأسها الأهلي وبيراميدز، تتجاوز مليارات الجنيهات، بينما يعاني الزمالك من أزمة مالية خانقة.

وقال باسم مرسي في تصريحات عبر برنامج “اللعيب”، على قناة “mbc masr”: “طبعًا أنا معترض إن الأهلي ياخد الدوري من دلوقتي يعني، كابتن شريف حازم بيقول الأهلي كده، بس أديني فرصتي إنّي أرد في الحتّة دي، وهردّ عليك ليه النجوم بتمشي”.

وتابع: “إنت راجل دلوقتي ميزانية المنافس بتاعي ٨ مليار، وأنا ميزانيتي ما تكملش ٣٠ أو ٤٠ مليون، خزنتي ما فيهاش فلوس. هتقول لي: أنا مالي؟ وأقول لك: أنا كمان مالي؟ كل ما أعمل فرقة تنافس وتكسب الأهلي وتوصل لإفريقيا، المجلس يتحلّ”.

وأضاف: “ما فيش مرتبات للاعيبة، والنجوم تمشي تاخد فلوسها من النادي اللي أنا إديتها حقها، معلش، أنا مش اللي بحلّ نفسي. مجالس الإدارات هي اللي بتتحلّ. ومع ذلك، الجانب الآخر لما بيتحلّ مجلس الإدارة، الوزير هو اللي بيغيّره، مش المجلس نفسه. المنافس بتاعي الوزير هو اللي مشاه، مش المجلس”.

وواصل: “مع ذلك، دلوقتي طلع طرف تاني معاه فلوس، بيراميدز. هو رقم واحد في مصر في اللحظة اللي بكلمك فيها. معاه فلوس بس. النادي الأهلي معاه فلوس، جماهير، ميزانية، لعيبة، كل حاجة. بيراميدز طلع بفلوس بس وبقى رقم واحد في مصر. ما بالك بقى لو نادي الزمالك معاه فلوس ومعاه جمهوره؟”.

وأردف: “ما فيش ولا نجم هيمشي من عندي، وساعتها الكابتن شريف مش هيقول الأهلي واخد الدوري من دلوقتي”.

وتساءل: “السنين اللي فاتت، أنا اللي كنت بمشي نفسي؟ كل مرة أعمل فرقة تنافس الأهلي وتاخد منه بطولات، المجلس يتحلّ، واللاعيبة تمشي عشان ما فيش فلوس. بعد كده تروح للنادي المنافس”.

واختتم: “النادي الأهلي بشعبيته بجمدانه، مين اللي خد مكانه دلوقتي وهو معاه كل حاجة؟ طبعا بيراميدز أحسن فريق في مصر، مش انا راجل زملكاوي؟ بقولك أحسن فريق في مصر الآن بيراميدز، الأهلي كان كويس الموسم الماضي، حاليًا من الذي فاز ببطولة إفريقيا؟، الأهلي ناد كبير ومحترم لكن لما دخل في مقارنة مع بيراميدز مين كسب؟ بيراميدز.. هو رقم واحد في إفريقيا”.