اخبار الزمالك المصري : الزمالك لم يشهد استقرار مادي إلا في عهد مرتضى منصور! فيديو
أعرب الكابتن طارق يحيى، نجم نادي الزمالك السابق، عن حزنه الشديد تجاه ما يمر به النادي في الفترة الحالية من أزمات مالية وصراعات داخلية، مؤكدًا أن استمرار هذه الخلافات يهدد مستقبل القلعة البيضاء ويؤثر بشكل مباشر على استقرار الفريق.
وقال طارق يحيى خلال تصريحاته في برنامج «اللعيب» على قناة MBC مصر: “اللي بيحصل في نادي الزمالك شيء يحزن جدًا. دي فترة صعبة ومحتاجة من كل الزملكاوية يقفوا جنب النادي ويشيلوا معاه الحمل، مش وقت مصالح شخصية ولا تصفية حسابات. لازم الكل يتوحد على حب الزمالك.”
وتابع: “نادي الزمالك دايمًا بيدفع الثمن، سواء من صراعات مجالس الإدارة أو تضارب المصالح بين مسؤولين سابقين وحاليين. نفس السيناريو بيتكرر من سنين، ومفيش حد بيتعلم أو بياخد خطوة للإصلاح. الخلافات جوه المجلس الواحد بقت ظاهرة غريبة جدًا، رغم إن الكل اتفق على اختيار المجلس الحالي.”
وأضاف يحيى: “أنا مش فاهم ليه في مشاكل جوه النادي بين الأعضاء وبعضهم، زي اللي بيحصل مع أحمد سليمان مثلًا. المفروض إن الناس تشتغل لمصلحة النادي مش لمصلحتها الشخصية. النادي بيمر بأزمة مالية كبيرة، ومينفعش نظل منتظرين إن الأرض ترجع أو الفلوس تيجي من السما. لازم يكون في خطة بديلة واضحة.”
واستكمل حديثه قائلًا: “الضغوط الجماهيرية زادت جدًا، وهي السبب في قرارات متسرعة ملهاش علاقة بالواقع. الجمهور ليه حق يزعل بعد المباريات الأخيرة، خصوصًا بعد ماتش الأهلي وغزل المحلة، بس لازم الكل يكون عنده وعي بالظروف اللي بيمر بيها النادي.”
وأشار إلى أن أزمة الفريق مش فنية فقط، بل نفسية ومادية أيضًا، قائلاً: “أنا مش بلوم اللعيبة، بس لازم يعرفوا إنهم بيلعبوا لنادي كبير اسمه الزمالك. حتى لو في مشاكل مالية، لازم يحسوا بالمسؤولية. ومعظم اللاعبين مش من أبناء النادي، بس ده مش مبرر، لأن القميص الأبيض له قيمة وتاريخ. في نفس الوقت الإدارة لازم تشتغل على حلول للأزمة، الاتنين لازم يمشوا في خط واحد.”
وأكد يحيى بثقة: “أنا عند رأيي.. الزمالك لسه يقدر ياخد الدوري، بس بشرط إن اللعيبة تفوق وتعرف إنها بتمثل نادٍ بطولات. ضيعنا 12 أو 13 نقطة بسهولة جدًا، ولو النقاط دي موجودة كنا في مكان تاني خالص في الجدول.”
واختتم تصريحاته قائلاً: “فاكرين الموسم اللي الزمالك خد فيه الدوري؟ كان عنده سبع مباريات مؤجلة وكسب أغلبهم، والموقف ده شبه اللي إحنا فيه دلوقتي. لسه في أمل، والزمالك يقدر يرجع لو اشتغل بتركيز والتفّ الكل حواليه من غير خلافات.”
ملحوظة: مضمون هذا الخبر تم كتابته بواسطة موقع اخبار الزمالك , ولا يعبر عن وجهة نظر حضرموت نت وانما تم نقله بمحتواه كما هو من موقع أخبار الزمالك ونحن غير مسئولين عن محتوى الخبر والعهدة على المصدر السابق ذكرة.
