اخبار الزمالك المصري : “أقصى أحلامه يشتري شقة وعربية”.. شوبير يفجر مفاجأة بشأن حقيقة طلب محمد السيد 10 ملايين للتجديد مع الزمالك! فيديو

تحدث الإعلامي أحمد شوبير، خلال برنامجه الإذاعي صباح اليوم الأربعاء، عن تفاصيل المفاوضات بين نادي الزمالك واللاعب محمد السيد لتجديد عقده، مؤكدًا أن ما يتم تداوله حول طلب اللاعب مبلغ 10 ملايين جنيه غير دقيق، كاشفًا كواليس الجلسة التي جرت بين اللاعب ومسؤولي النادي قبل سفره إلى المونديال.

وقال شوبير: “تردد خلال الأيام الأخيرة إن محمد السيد طالب 10 مليون جنيه عشان يجدد عقده مع الزمالك. ده طبعًا تسريب، يا جماعة من ساعة آخر جلسة وهم ما عادوش يتكلموا مع بعض خالص. قعدة التفاوض اللي حصلت مع محمد السيد كانت قبل سفر الولد إلى المونديال، وكانت قعدة كده خفيفة مع جون إدوارد، يعني مش قعدة اتفاق نهائي ولا توقيع، مجرد كلام مبدئي.”

وتابع: “اللي اتعرض عليه كان عقد لمدة 3 سنين: ياخد 3 في أول سنة، و4 في الثانية، و5 في الثالثة. وبصوا يا جماعة، عشان محدش يقول أسعار كبيرة أو مبالغ فيها، سوق الكورة دلوقتي فيه أرقام أكبر من كده بكتير، فبلاش نقارن بمهندس أو مدرس أو موظف، لأن كل مجال وله طبيعته.”

وأضاف: “الولد وقتها قال الكلام ده صعب بالنسباله، خصوصًا إن فيه خصم 25% نسبة مشاركة، وهو ما بيلعبش كتير، فبيتخصم منه النسبة دي، وكمان ضرائب، يعني بيخسر تقريبًا نص العقد. فشايف إن الأرقام دي مش ماشية معاه.”

وأردف: “بعد شوية في نفس القعدة، وكيله قال ممكن ناخد منحة توقيع في حدود من 7 إلى 8 مليون جنيه كإضافة على العقد. وقالوا إن الولد عايز يشتري شقة وعربية، وده طبيعي جدًا، كل لعيب بيبقى حلمه يشتري شقة وعربية يعيش بيهم.”

واستكمل: “أنا نفسي أيام الثمانينات اشتريت شقة بـ53 ألف جنيه، وكان مبلغ ضخم وقتها، كنت واخدهم من حمايا، والعربية ساعتها كانت بـ20 أو 30 ألف جنيه، وأغلى عربية كانت بـ50 ألف. كنا بنشتري عربيات مستعملة وكنا مبسوطين بيها جدًا.”

وواصل: “فالولد النهارده طبيعي عايز يشتري عربية يروح بيها النادي، وشقة يعيش فيها، مفيش حاجة غريبة في ده. لكن بعدها ما حصلش أي جلسة تانية، لأن جون إدوارد قال إن فكرة منحة التعاقد دي مش ضمن سياسة النادي، وإن لو هيضاف مبلغ، يبقى ضمن العقد نفسه.”

واستطرد: “ما حصلش أي جلسة جديدة بعد كده، لكن أنا عارف إن الولد ممكن يرضى بأرقام أقل، بس بشرط يكون الكلام جدي. هو كمان بيحلم بالاحتراف، وكان جاله عرض قبل كده بس الزمالك ما وافقش.”

واختتم: “عقده بينتهي نهاية الموسم، ومعناه إنه في يناير ممكن يوقع لأي نادي. فهنشوف نادي الزمالك هيعمل إيه معاه خلال الفترة الجاية.”