اخبار الاهلي المصري : نيدفيد: الأهلي قدّر رمضان صبحي بشكل كبير ولكن خذلنا وتجاهلت الرد عليه

تحدث كريم نيدفيد لاعب النادي الأهلي، عن علاقته بزميليه السابقين رمضان صبحي وناصر ماهر، وذلك خلال ظهوره في بودكاست “فنجان شاي” مع الإعلامي أحمد أسامة.
وقال نيدفيد:“العلاقة بيننا وبين رمضان أو ناصر مش موضوع، يعني مافيش كلام بيننا في التليفون أو حاجة، لكن لما بنقابل بعض بنسلم على بعض ونتكلم ونتطمن، وخلاص. العلاقة مش صحاب قوي، لكن مش بنكره بعض، العلاقة عادية جدًا”.
وأكمل: “كنت أنا ورمضان مع بعض في كل المنتخبات، الشباب والأولمبي والناشئين، فكانت علاقتي بيه أقوى شوية من ناصر. بعد ما احترف رمضان، العلاقة قلت، لكن طول ما إحنا بنتعامل مع بعض العلاقة كويسة، ولما مافيش تعامل يومي خلاص مافيش علاقة، بس مافيش أي مشكلة بينا.”
وأضاف:“موضوع بيراميدز بالنسبة لرمضان كان قرار هو شايفه صح من وجهة نظره، وهو اللي يتحمل نتيجته. هو كان شايف العرض مناسب ليه، وبيتحمل القرار في النهاية.
ولفت: “رمضان جوه الأهلي الناس كانت بتقدره جدًا وبتحترمه، وكان واخد وضع كبير وهو صغير جدًا، فقرار الرحيل ماكانش حلو علينا إحنا ولاد النادي. القرار ممكن يبقى عادي لأي حد، لكن لينا إحنا اللي اتربينا جوه الأهلي ماكانش منطقي، خصوصًا في السن والتوقيت ده.”
وتابع:“ما اتكلمتش مع حد وقتها، بس كنت متضايق. لما بيراميدز أعلن رسميًا إن رمضان انتقل ليهم، كتب رمضان رسالة وداع على جروبنا في الواتس آب، وأنا ماقدرتش أرد”.
وأشار: “كنت متأثر جدًا لأن الموقف بالنسبة لي ماعداش بسهولة، خصوصًا إن النادي الأهلي كان مقدره جدًا، وكان بيعمله كل حاجة ممكن تتعمل، فحسّيت إن القرار ده كان صعب علينا شوية. رمضان كان أغلى إعارة وقتها، فالموضوع كان كبير بالنسبة لنا، لأننا كنا شايفين إن الأهلي عمل كل حاجة عشانه.”
واختتم نيدفيد حديثه قائلًا:“أنا ورمضان شفنا بعض قريب في النادي، وسلمنا على بعض عادي، مافيش أي حاجة. كل واحد دلوقتي في طريقه، وربنا يوفق الجميع.”
ملحوظة: مضمون هذا الخبر تم كتابته بواسطة موقع جماهير الأهلي , ولا يعبر عن وجهة نظر حضرموت نت وانما تم نقله بمحتواه كما هو من موقع جماهير الأهلي ونحن غير مسئولين عن محتوى الخبر والعهدة على المصدر السابق ذكرة.