اخبار الاهلي المصري : شهادة تاريخية من حمادة عبد اللطيف: اتهام الأهلي بالفوز بالحكام كلام سخيف

انتقد حمادة عبد اللطيف، نجم الزمالك السابق، الاتهامات المتكررة التي تُوجه للنادي الأهلي بشأن فوزه بالمباريات والبطولات بمساعدة التحكيم، واصفًا هذه الأحاديث بأنها “سخيفة وغير منطقية”، ومؤكدًا أن الأهلي حقق إنجازات ضخمة لا يمكن اختزالها في أخطاء تحكيمية.

وقال عبد اللطيف، في تصريحات عبر الفيس بوك:“من أول يوم دخلت فيه نادي الزمالك وأنا عندي 14 سنة، والناس بتقول إن الأهلي بيكسب بالحكام. الكلام ده سمعته من المسؤولين في قطاع الناشئين قبل مباراة ضد الأهلي. قالوا لنا: خلي بالكم، الحكام هيجاملوا الأهلي… لكن لما لعبنا، الحكم كان ممتاز ومحستش بأي ظلم، كنا كويسين وكسبنا، وماكانش فيه تحامل ضدنا.”

وأضاف:“الموضوع ده بيتكرر كل شوية، أول ما نخسر، الناس تقول الحكم جامل الأهلي. طب ما إحنا كسبنا قبل كده، محدش قال الحكم جامل الزمالك ليه؟ الكلام بقى مكرر وسخيف.”

وتابع نجم الزمالك السابق قائلاً:“الأهلي كسب 45 بطولة دوري عام من يوم تأسيسه سنة 1907، ولسه في ناس بتقول الأهلي بيكسب بالحكام! طب معقول يعني النادي ده معندوش نجوم؟ معندوش لاعيبة مميزة؟!”

وأكد عبد اللطيف أن الأهلي أيضًا حصد 39 بطولة كأس مصر، و12 لقبًا لدوري أبطال إفريقيا، متسائلًا بسخرية:

“برضه بالحكام؟ يعني الأهلي كسب كل ده بالحكام؟ لا طبعًا، ممكن تحصل مجاملة من حكم مرة أو اتنين سواء للأهلي أو الزمالك، عادي، عشان الشعبية الكبيرة، بس مش في 45 دوري و39 كاس و12 إفريقيا!”

واختتم حديثه قائلاً:“أنا بحب الكلام الموزون، بتكلم من عقلي مش من عاطفتي أو انتمائي. اللي مش عايز يعترف بواقع بطولات الأهلي، يبقى مغيب عن الحقيقة.”