اخبار الزمالك المصري : شوبير يفتح النار على وكيل فيريرا قبل القمة.. ويُهاجم الإعلاميين: “كنت بعمل زيهم”! فيديو

أبدى الإعلامي أحمد شوبير استياءه من تصريحات وكيل المدرب يانيك فيريرا حول وجود عرض بلجيكي محتمل للمدير الفني، معتبرًا أن توقيت طرح مثل هذه الأحاديث غير مناسب في ظل استعادة الزمالك لعدد من لاعبيه الموقوفين وعودة الاستقرار للفريق قبل المباريات المقبلة.

وقال شوبير في تصريحات عبر برنامجه الإذاعي: “فريرا أكثر الناس سعادة لأنه هيرجع له بزيرا اللي كان موقوف، وهيرجع له الونش اللي كان موقوف، وكمان هيرجع له بين تايج اللي كان موقوف”.

وتابع: “يعني طبعًا في حالة استياء شديدة جدًا من خالد سليمان وكيل فريرا، اللي خرج في الساعات الأخيرة وقال إن في عرض بلجيكي للمدرب. ناس كتير في الزمالك شايفين إن التوقيت مش مناسب خالص، وأنا بصراحة مش فاهم وكلاء اللاعبين دلوقتي”.

وأضاف: “كل الحب لزملائي الإعلاميين، والله أنا عارف إنهم ما يقصدوش حاجة، لكن فكرة إنك كل شوية تستضيف وكيل لاعبين ده على فكرة ما بيحصلش بره. في النهاية هو وكيل لاعبين، شغلته معروفة، لكن إني أجيبه على الهواء ويبدأ يحكي ده بكام وده فين وده إزاي، دي حاجة أنا زمان كنت بعملها لكن قررت من بدري أوقفها”.

واختتم: “فتيجي دلوقتي والفرقة مستقرة والدنيا ماشية كويس، وتقول لي فيه عرض أو كلام مش مناسب، لا، ده صعب”.