اخبار الزمالك المصري : “زمالك إيه؟ ده لعيبة بتهرب وفسخ عقود بالجملة”! فيديو

فجّر الإعلامي أحمد شوبير مفاجآت جديدة حول الأزمات المتلاحقة داخل نادي الزمالك، مشيرًا إلى أن الوضع الحالي داخل النادي تخطّى حدود المشكلات التقليدية وبات يصل إلى مرحلة تهديدات قانونية وفسخ عقود متتالية، وهو ما أكد أنه نتيجة مباشرة لسوء إدارة الملفات داخل النادي خلال الفترة الأخيرة.

وقال شوبير في برنامجه الإذاعي صباح اليوم الإثنين: “نتكلم في هوجة فسخ التعاقدات في الزمالك، لإن ده مهم جدًا. عمر فرج فسخ عقده بالفعل وقدّم شكوى عشان ياخد مستحقاته. عمر فرج ما بيتمرنش مع الفريق الأول يعني… عمر بيقولوا عليه بقى متجمد يعني. فالولد حاول مرة واتنين وتلاتة… ما ينفعش. أنهى الإجراءات ومشي، سافر من القاهرة، وكمان قدّم شكوى عشان ياخد مستحقاته، ومن ضمن تفاصيل الشكوى إن النادي رفض يخليه يتمرن مع الفريق الأول، وإنه ما أخدش فلوسه”.

وتابع: “طب يا جماعة… لا بيتمرن ولا بياخد فلوس! والراجل مغترب… هيقعد عند مين؟ وهيصرف منين؟ قصة غريبة من أولها. أنا قلتها لكم قبل كده. ده تم ضمه لمجرد إن وكلاء قالوا إن الأهلي خلاص بيخلص معاه، فجروا في الزمالك وقالوا ناخده تبقى خَبطة… الفيلم اللي احنا عايشينه ده. وقالوا: صفقة العمر. وفي الآخر؟ ما لعبش! لعب ماتش وجاب جون، بس ما أخدش وقت. اتمد إعارة للسويد ورجع. طب ما تسوقه؟ طالما مش هتحتاجه؟”.

وأضاف: “الموضوع من الأول باين إنه مش هيلعب. وأهو لما بنتكلم يزعلوا. بس إدارة الأزمات في الزمالك سيئة جدًا جدًا. لا بيع لعيبة ولا شراء ولا تسوية ولا تراضي. واللاعيبة وصلت إنها تعمل شكاوى. والولد فسخ عقده بالقانون، يعني خلاص… ما تقدرش تعمل معاه حاجة. واللي ما عندهوش نادي الفيفا بيسمح له يلعب في أي وقت”.

وأردف: “هيروح للفيفا… ولو راح للمحكمة الرياضية كل الورق اللي معاه يثبت إنه ما أخدش فلوسه ولا مستحقاته، وبالتالي هو صاحب حق. ده فرجاني ساسي سايبك وخد حكم نهائي. وبصوا على الإسماعيلي… مش بس ديون وإيقاف قيد، ده دخل على خصم نقاط ولو ما دفعش ممكن يهبط درجات”.

وقال أيضًا: “والله يا جماعة لولا جماهير الزمالك كان حصل للنادي حاجات أكتر من كده 100 مرة. خسارة فنية ومادية. اللاعب أصلاً ما كانش ينفع ييجي الزمالك. ما تابعتوش، بس جبته عشان إشاعة إن الأهلي هيشتريه. هل ده مقبول؟”.

وتابع: “مصادر جوه النادي بتقول إن عمر فرج قريب من نادٍ سعودي، وإنه لما مشي كان مظبط نادي هناك، وهيكمل شكواه. وبعد ما مشي الإدارة بدأت تتحرك عشان ما يتصعّدش الموضوع، بس هيصعّد لو ما أخدش فلوسه. يبقى ادّوله فلوسه وخلاص”.

وأضاف: “عمر فرج ثالث واحد يفسخ من طرف واحد… قبله صلاح مصدق وعبد الحميد معالي. وفي رعب جوه النادي. قالوا إنهم ادّوا بزيرا 50 ألف أو 75 ألف دولار، وكل الأجانب بيسألوا. محمود بن تاج ما فسخش زي ما قلت امبارح بس بيسأل رسمي. وبزيرا بقى بيسأل برضه”.

واستكمل: “الإدارة بتحاول توفر سيولة عشان تحتوي الأزمة، وتبقى في موقف قانوني سليم. بس لسه الفلوس مش موجودة. فممكن يدّوا فلوس للاعيبة معينة بس… زي بزيرا وبن تاج وشيكو بنزا وآدم كايد وعدي الدباغ… والباقي؟ الله أعلم”.

وختم شوبير: “أنا بطلب من لاعيبة الزمالك المصريين يصبروا… النادي في أزمة. الجماهير عملوا هاشتاج بيدعموا رئيس الجمهورية وبيطالبوا بإنقاذ الزمالك. الناس خايفة وقلقانة. ونتمنى الأزمات دي تنتهي”.