اخبار الزمالك المصري : تعليق صادم من شوبير على تعيين أحمد عبد الرؤوف مديرًا فنيًا لـ الزمالك: “كبيرة عليه”! فيديو

تحدث الإعلامي أحمد شوبير عن قرار نادي الزمالك بإقالة المدرب البلجيكي يانيك فيريرا من منصبه كمدير فني للفريق الأول، مؤكدًا أن القرار لم يكن مفاجئًا، لكنه أبدى تحفظه على تعيين أحمد عبد الرؤوف مديرًا فنيًا مؤقتًا للفريق في هذه المرحلة.

وقال شوبير في تصريحات عبر برنامجه الإذاعي صباح اليوم الأحد: “بصراحة، إقالة يانيك فيريرا ما كانتش مفاجأة خالص، لأن النتائج كانت مش على المستوى، لكن اللي فاجئني فعلاً إن الكابتن أحمد عبد الرؤوف هو اللي يمسك كمدير فني مؤقت. أنا كنت متوقع يكون مدرب مساعد، لكن كمدير فني دي خطوة كبيرة عليه شوية في التوقيت ده.”

وأضاف شوبير: “الزمالك دلوقتي بيدوّر على مدرب جديد، سواء أجنبي أو مصري، لكن بصراحة النادي في وضع صعب جدًا من الناحية المادية. أنا كنت بتكلم امبارح مع واحد من قيادات الزمالك وقالّي بالنص: مافيش مليم في النادي. الناس بتحاول تمشي الأمور على قد ما تقدر.”

وتابع: “أنا كنت شايف إن الأفضل يفضل يانيك فيريرا لحد نهاية بطولة السوبر، طالما لسه ما جبتش مدرب جديد، يكمل الراجل للنهاية، وبعد كده تعمل تغيير في وقت مناسب.”

وأكمل حارس الأهلي السابق كلامه قائلًا: “أحمد عبد الرؤوف السنة دي كان عنده تجربتين في دوري المحترفين، مع السكة الحديد وبلدية المحلة، وماكانوش ناجحين قوي، بس طبعًا الظروف مختلفة والإمكانيات غير إمكانيات الزمالك.”

واختتم شوبير: “كان هيبقى الوضع أفضل لو معاه مدرب خبرة يساعده، وهو كده كده شاب كويس وطموح، بس يا رب يوفقوه الفترة دي لحد ما النادي يستقر على مدير فني جديد.”