اخبار الزمالك المصري : بطولة بيراميدز تساوي 20 بطولة لـ الزمالك والأهلي!

أشاد الإعلامي خالد الغندور بالإنجازات التاريخية التي يحققها نادي بيراميدز خلال الموسم الحالي، مؤكدًا أن الفريق أصبح أحد أبرز أندية القارة الإفريقية، بعد تتويجه بعدة بطولات كبرى في وقتٍ قصير.

وقال الغندور في برنامجه “الحريفة” على إذاعة أون سبورت إف إم: “بيراميدز بيكتب تاريخ جديد للكرة المصرية، ولفريق جديد في القارة السمراء. الفريق السنة دي بيكسب في كل البطولات اللي بيشارك فيها، فاز على نهضة بركان في السوبر بهدف في آخر نص ساعة، وحافظ على النتيجة لحد ما رفع الكأس.”

وأضاف: “من ساعة ما الأهلي خد السوبر الإفريقي سنة 2021، البطولة دي كانت دايمًا بتروح لبطل الكونفدرالية، لكن بيراميدز كسر القاعدة دي. النهارده كمان فاز بدوري الأبطال على صن داونز، والسوبر على نهضة بركان، اللي هو بطل المغرب والكونفدرالية، يعني بيتوّج على حساب الكبار.”

وتابع مازحًا: “بيراميدز حتى بقى بينافس الأهلي والزمالك في الأغاني! يعني كل ما الزمالك ياخد بطولة نسمع (التالتة يمين)، والأهلي ليه أناشيده، طب فين أغنية بيراميدز؟ مش نادي مصري برضه؟ ليه ما نسمعش حاجة ليه؟”

وكمل كلامه: “الناس بتسألني ليه بتصيت لبيراميدز؟ طب ما الأهلي والزمالك بيتصيتوا على طول! هو علشان بيراميدز ما عندوش جمهور يعني ما نحتفلش بيه؟ لأ طبعًا، الراجل ممدوح عيد عامل إنجازات كبيرة جدًا، ولو اللي عمل كده الخطيب أو حسين لبيب، كانت الدنيا كلها قامت.”

وشدّد الغندور: “بطولة بيراميدز دي تساوي عشرين بطولة للأهلي والزمالك، لأن الفريق ده بيكسب من غير دعم إعلامي، ولا جمهور، ولا قناة، ولا حتى تأجيل مباريات. بيلعب كل تلات أو أربع أيام، وبرغم كده مكمل وبيفوز.”

وختم كلامه قائلًا: “الفريق الوحيد اللي كسب الأهلي الموسم ده 2-0، وبكل سهولة كمان. فبيراميدز لازم ياخد حقه زي أي نادي كبير، مش علشان ما عندوش جمهور نتجاهله. برافو يا بيراميدز، والله تستحق كل التقدير والتصفيق.”