اخبار الزمالك المصري : “اللاعب اللي عندك مش جايلك عشان سواد عيونك!” فيديو

تحدث الإعلامي أحمد شوبير عن أزمة مستحقات لاعبي الزمالك الأجانب، مؤكدًا أن النادي يسابق الزمن من أجل إنهاء الأزمة قبل انتهاء المهلة المحددة من الاتحاد الدولي لكرة القدم.

وقال شوبير في تصريحات عبر برنامجه الإذاعي: “الزمالك دلوقتي بيسابق الزمن علشان يوفّر جزء من مستحقات اللعيبة الأجانب. الإدارة ومعاهم جون إدوارد بيحاولوا بكل الطرق يخلّصوا الفلوس المطلوبة قبل يوم 15 أكتوبر.”

وأضاف: “اللعيبة الأجانب، زي محمود بن تيك وإخوان بذيرة، بعتوا إنذار رسمي للنادي إن لازم ياخدوا مستحقاتهم قبل التاريخ ده، وإلا هيقدّموا شكوى. ولو الزمالك اتأخر، العقود ممكن تتفسخ، لأن اللوائح بتقول كده بالنص.”

وتابع شوبير: “الزمالك لازم يجاهد ويشوف حل. وأنا عارف إن في ناس ممكن تزعل مني، بس لازم أقولها بصراحة: اللاعب المحترف مش بييجي عشان سواد عين النادي، لا الأهلي ولا الزمالك ولا أي نادٍ تاني، هو بييجي علشان العرض المالي.”

وواصل حديثه قائلًا: “اللاعب بييجي علشان لقى عرض أحسن. لو بياخد مبلغ معين في المغرب أو فرنسا أو أي بلد، والنادي في مصر عرض عليه أكتر، طبيعي ييجي. هو شاف مصلحته، والنادي كمان استفاد، وده الطبيعي في الكورة.”

وأضاف: “بس لما اللاعب ما ياخدش فلوسه، من حقه يطالب بيها. هو مالوش دعوة بالظروف ولا المشاكل المالية، هو عايز حقه، وده أبسط حق ليه.”

واختتم: “اللاعب عمره في الكورة قصير، 10 أو 15 سنة بالكتير، وبيتنقل من نادٍ للتاني علشان يأمّن مستقبله. علشان كده لازم الزمالك يشوف حل بسرعة، لأن أي تأخير هيكلّف النادي كتير.”