اخبار الزمالك المصري : الزمالك نجا من كارثة إدارية أمام المحلة.. ويفتح النار على فيريرا وهؤلاء اللاعبين!

أكد الإعلامي أحمد شوبير أن نادي الزمالك نجا من أزمة إدارية أمام غزل المحلة في المباراة التي حسمها التعادل الإيجابي بهدف لمثله، والتي أقيمت مساء أمس السبت ضمن منافسات الجولة العاشرة من بطولة الدوري المصري الممتاز.

وقال شوبير في تصريحات إذاعية صباح اليوم الأحد: “امبارح الزمالك إيه ربنا سترها معاه، حتى البونط اللي خده كان هيطير منه! أنتم عارفين اللائحة بتاعة الدوري المصري بتقول إن في ستة أجانب بس في القايمة، ويشارك منهم خمسة في أرض الملعب. الزمالك كان حاطط في الأول سبعة لاعيبة أجانب: محمود بنتايج، خوان بيزيرا، صلاح مصدق، شيكو بانزا، عبد الحميد معالي، سيف الجزيري، وبارون أوتشينج الكيني”.

وأضاف شوبير موضحًا: “الحمد لله حد لحقهم قبل الماتش، وشالوا أوشينج ودخلوا سيف جعفر مكانه. وعلى فكرة القايمة دي هي اللي اتسجلت رسمي، لأن في ناس كتير كانت فاكرة إن الزمالك هيتحسب خاسر 3-0 زي ما حصل قبل كده بين مودرن والإسماعيلي السنة اللي فاتت. عشان كده لازم الإداريين في الزمالك ياخدوا بالهم من الحاجات دي”.

وتابع شوبير: “بصراحة أنا عايز أقف شوية عند فيريرا. أنا مش من الناس اللي بتحب التغيير السريع في الأجهزة الفنية، لكن اللي حصل امبارح غريب جدًا. الراجل استبعد آدم كايد لأسباب فنية رغم إنه كان بيلعب أساسي في كل الماتشات اللي فاتت، ومكنش ناوي يدخل سيف جعفر خالص، وفجأة بعد ما شال أوتشينج قال نحطه ونكمل وخلاص! وبعدين نزله يلعب! يعني حاجة مش مفهومة”.

واستطرد قائلًا: “مثلاً، لما اتصاب عدي الدباغ قدام الأهلي نزل ناصر منسي وما قدمش الدور المطلوب، وامبارح لما اتصاب أحمد شريف اللي كان عامل شكل حلو في الجناح الشمال، نزل عبد الحميد معالي وماعملش أي حاجة. بعد كده بقى تغيير مراكز بين بيزيرا وناصر ماهر ومعالي، والتركيبة الهجومية كلها اتلخبطت. ودي نقطة مهمة جدًا”.

وأردف شوبير: “قبل ماتش الأهلي والزمالك قلت إن مفاتيح لعب الزمالك هما ناصر ماهر وعبد الله السعيد، لكن الاتنين مكانوش في مستواهم. ناصر ماهر لعيب كويس جدًا، بس يا ناصر لازم تعرف إنك بتلعب في نادي كبير بيلعب على بطولات، يعني اللعب الفردي مش هينفعك. إحنا مش بنلعب كاراتيه ولا سكواش، دي لعبة جماعية”.

وواصل حديثه قائلًا: “ناصر ماهر أضاع فرص كتير بسبب الفردية، وده بيجنن جمهور الزمالك. في المقابل، أحمد ربيع كان ممتاز وسجل هدف حلو جدًا من ضربة ركنية، وأحمد حمدي كمان كان كويس في نص الملعب، عمل شغل محترم جنب عبد الله السعيد. يعني مفيش مشكلة كبيرة في نص الملعب، المشكلة الحقيقية في الدفاع”.

وأوضح شوبير: “الهدف اللي دخل مرمى الزمالك امبارح غريب جدًا! كورة ضالة من دفاع المحلة، يقوم مدافعين الزمالك يدوها هدية لمهاجم المحلة اللي مرر لزميله، وبقينا اتنين على اتنين قدام الدفاع. الموقف مش كارثي لو اللي قدامك ميسي ولا رونالدو، بس اللي حصل إن محمود صلاح حطها حلو جدًا على شمال محمد صبحي وسجل الهدف. الغلط واضح والتعامل كان ساذج”.

واستمر شوبير: “دول لعيبة منتخب مصر، يعني المفروض التركيز يكون أعلى من كده بكتير. كلنا بنشيد بحسام عبد المجيد ومحمد إسماعيل، لكن اللي حصل يخلي الواحد يسأل: في إيه؟ في حاجة غلط أكيد”.

واختتم شوبير تصريحاته قائلًا: “فيريرا لازم يسيطر على نفسه شوية، مش كل شوية يطلع يكتب على صفحته كلام بعد الماتش. يقول لك (نفقد نقاط لا نستحقها، والمباريات لها سيناريوهات مختلفة)، طب ما هي السيناريوهات دي يا عم فريرا اشتغل عليها، ما تبررش! الزمالك محتاج هدوء وتنظيم مش تبريرات وكلام في الفاضي”.